ತಂಗಿ, ಪ್ರೀತಿಯ ಕೂಸೇ!
ತವರೇ ಹಾಗೆ....ತಂಪು
ಬೆಚ್ಚಗೆ....ಬೊಂಬಾಯಿ!
ದುಗುಡ ದುಮ್ಮಾನಗಳನೆಲ್ಲ
ಸದ್ದಿಲ್ಲದೇ ನುಂಗಿ
ನಕ್ಕು ಹಗುರಾಗಿಸುವ
ಪ್ರೀತಿಯಗೂಡು.
ತೆರೆದ ಮನೆ...ಮನ
ಎಂದಿಗೂ ಮುಚ್ಚದ ಬಾಗಿಲು
ತಬ್ಬಲಿಗಳಾರಿಲ್ಲವಿಲ್ಲಿ
ಇಲ್ಲಿ ಎಲ್ಲವೂ ಎಲ್ಲರದು
ಹೊರ ಜಗುಲಿ, ಒಳ, ದೊಡ್ಡೊಳ
ಮೆತ್ತಿ, ಮೇಲ್ಮೆತ್ತಿ ಖೋಲಿಗಳಲ್ಲೆಲ್ಲಿಯೂ
ಗುಮ್ಮನಿಲ್ಲ! ಅಮ್ಮ ಇದ್ದಾಳೆ
ಪ್ರೀತಿಯ ಹೊಳೆಹರಿಸಿಯೂ
ಮೌನಿಯಾಗಿ ದಾರಿದೋರುವ
ಅವಧೂತ ಅಪ್ಪನಿದ್ದಾನೆ
ತುಂಬಿದ ಮನೆ....ಮನ
ಬಿಂದಿಗೆಯ ಮೊಗೆಮೊಗೆದು
ತುಂಬಿಸಿಕೋ....ಆನಂದ....
ಬಾಳು ಬೆಳಕಾಗಲಿ

ವಸಂತ
16 ಜೂನ್ 2013